ماعاد نبغـى فـي الرواتـب زيـاده‏ !!!

يا من يوصّل كلمتي للقيادة
للحاكم المحبوب والوالد البار
ما عاد نبغي في الرواتب زيادة
اللي نبيه اليوم تخفيض الأسعار
التاجر المليان حط الوسادة
يبي يوصّل رأس ماله المليار
والا المواطن صار سهل اصطياده
جته الهوامير بوسط غب الإبحار
وأصبح نهار وليل وسط العيادة
ما بين طب الراس والقلب وشهار
والراتب الماخوذ جته القرادة
ما ينزل الا صافقه مثل الاعصار
فاتورة الهاتف وعاجل سداده
والقرض والكهرب وتسديد الايجار
والرأس صاير فيه ورشة حداده
قام يتحلحل فيه مسمار مسمار
قلت الركادة مير ما من ركادة
كني مع الحجاج في رمي الأجمار
من عقب ما جانا قرار الزيادة
من مجلس أهل الجود وافين الأشبار
كل من الفرحة بيقدح زنادة
وجبنا القروض نضارب السوق وانهار
وجينا نبي بس الرجا والهوادة
والله وكيلك شبّت أسعارنا نار
يا من يوصل كلمتي للقيادة
للحاكم المحبوب والوالد البار
ياللي عطاك الله ملك وريادة
وحبٍ بقلب الشعب تعداد الأمطار
ما عاد نبغي في الرواتب زيادة
اللي نبيه اليوم تخفيض الأسعار